Dei som dyrkar tradisjonell, klassisk lyrikk, har det ikkje lett. Lyrikken brukar gjerne bilete frå mytologien, og den er det ingen som kjenner lenger, anten den er henta frå grekarane, Bibelen eller frå den gamle nordiske gudelæra. I slutten av 1994 sende TV2 eit program med namnet «The Julekalender», som for ei kort tid etablerte eit brukande mytologisk univers. Det var på same tida at Høgskulen i Bergen etablerte seg, og det gamle lunchrommet til lærarane vart bygd om til kontor for administrasjonen.
   
The HiB Julekalender
Eg satt på kontoret så seint her ein kveld.
Då kom det ein nisse av gamal modell.
Han sa: «Eg vil prøva å finna ei krå,
for der som eg var, vart eg jaga ifrå.
Eg byrja som husnisse på BTS
då lærarane gjekk der i lakksko og dress.
Reformane kom nok i ny og i ne,
men alt det dei gjorde, så flytta eg med.
Bak lunchrommet var eg strategisk plassert,
og heldt meg så rimeleg bra informert.
Men nissen har fiendar. Gløym ikkje det!
Du hugsar nåsåen som var på TV?
Då skjønar du kvifor vi alltid har trudd
at nåsåane lever og trivast i KUD.
Ja, sume har sagt (men det tvilar eg på)
at sjølvaste Hernesen er ein nåså.
Så måtte eg bort. Dei reiv veggene ned,
og snekra så saman ein ny HiB.
Og nett der eg før hadde finplassen min,
har Nils'en og Kari'en no flytta inn.
Der før det var trygt, er blitt framandt og rart.
Å vera ein nissemann - visst er det hardt.
No svimar eg rundt og vil finna ei krå,
og lengtar attende til min BIH!»
Slik var det at husnissen tala til meg.
Og var det ei skrøne, så lyg eg for deg.
 
Ukjende ord?
BTS - Bergen Tekniske Skole, vart seinare til BIH (Bergen Ingeniørhøgskole), som i 1994 gjekk inn i Høgskolen i Bergen (HiB).
KUD - har skift namn mange gonger, men er (var) det departementet som steller med skulesaker.
Hernesen - Gudmund Hernes, på den tida ein reformvillig statsråd.
Nils'en - Nils Mæhle, første direktør for Høgskulen i Bergen.
Kari'en - Kari Blom, første rektor ved Høgskulen i Bergen.